عندي طاقة عايز أطلعها في أي حاجة مفيدة إلا المذاكرة,باقي على إمتحاناتي ١٤ يوم المفروض أني أبقى أعد أذاكر بس مش بذاكر,لأني شايف المذاكرة في نظام التعليم الفاشل ده حاجة مش مفيدة بالعكس تضييع وقت و عمر بيضيع والنجاح في التعليم الحكومي المصري ده مش نجاح في الحياه.
فكرت من فترة أنا هدفي إيه في حياتي,أنا عملت إيه في حياتي أفتخر بيه,لقيت ولا حاجة ٢٠ سنة من حياة الواحد ضاعوا في ولا حاجة,فكرت برضه هو أنا أصلا هعيش كام ٢٠ سنة،عشان ٢٠ منهم يضيعوا كدة لقيت إن متوسط عمر الواحد ٦٠ سنة فيه ناس ربنا بيطول في عمرها و ناس ربنا بيفتكرها قبل كدة ربنا يعني يطول في عمركروا كلكوا بس المتوسط ٦٠,طب أنا ضاع منهم ٢٠ يعني تلت حياتي ضاع هستنى لما التلتين الباقيين يضيعوا هما كمان؟
من كام إسبوع كدة شفت فيلم اسمه "ذا بوكيت ليست" بتاع " جاك نيكلسون " الفيلم الهدف منه إنه بيقولك إكتب لنفسك قائمة كدة بأهدافك في حياتك و كل متحقق منهم هدف اشطب عليه,إكتب مثلا عاوز أشتغل في المكان الفلاني,عاوز أتجوز البنت الفلانية,عاوز ألف العالم إكتب أي أهداف و كل متحقق واحد اشطبه من القائمة,بس إلي فكرت فيه مش موجود في الفيلم و بدأت أطبقه مع نفسي،إني أشوف كل يوم بيوصلني لهدفي ولا لأ,قبل ما أنام أنا مشيت خطوة تقربني لهدفي ولا لسة في مكاني،ممكن على فكرة أكون بعمل حاجات شايفها ناجحة والناس شيفاني ناجح و محدش يقدر يقول عليها فشل،زي مثلا هقولكوا مثال،واحد بيعمل ماجستير و مديله كل وقته،و هو شايف نفسه ناجح و كل الناس شيفاه ناجح و بالتأكيد محدش يقدر يقول على واحد بيعمل ماجستير أو دكتوراه إنه فاشل،بس الراجل ده مش كاتب في القائمة بتعته هدف يخليه عشان يوصل لهدفه ده يعمل ماجستير فبصراحة أنا شايف إن الراجل ده فاشل،عشان بيضيع وقته في حاجة ممكن تكون ناجحة لكن مش بتوصله لهدفه،أو مثلا واحد كل يوم بيروح الكلية ٨ الصبح و يرجع ٥ المغرب يرجع ينام شوية عشان يصحى يذاكر و يطلع من الأوائل و فعلا لما النتيجة تطلع بيطلع من الأوائل،بس في القائمة بتعته مش كاتب إنه عاوز يبقى معيد ولا دكتور في الجامعة ولا أي حاجة تخليه يضيع كل الوقت ده عشان الناس تقول ده جايب إمتياز ولا أدام نفسه يكون جايب إمتياز.
ساعات الفشل بيبقى نجاح أنا كل سنة في الكلية بجيب مقبول و جيد بس مبسوط أوي و فخور بنفسي أوي أوي أوي أوي لأني شايف إني ناجح جدا في حياتي العمليه،أنا مش بجيب تقدير مش عشان فاشل أو ماليش في المذاكرة لكن عشان أنا قررت مضيعش فيها وقتي و الحمدلله نجحت في حاجات كتير تانية و فخور إني فاشل في الدراسه زي ما الناس بتقول على اي حد بيجيب تقدير قليل لأن الفشل في ظل التعليم المصري في حد ذاته نجاح إلي خلانا منحوطش أي أهداف لحياتنا و نمشي في الساقية ١٥ سنة تعليم بلا هدف يطلع عينينا عشان ننجح بمجموع كبير عشان نرضي أهلنا و ندخل السنة إلي بعدها سنة في سنة في سنة و في الأخر أنا أسف بنتخرج بهايم.
أنا عايزكوا بعد ماتقرأوا النوت دي كل واحد يسيب إلي في إيده و يفكر هدفوا إيه و إكتب لنفسك "بوكيت ليست" عاوز قبل ماتموت تكون عامل إيه في حياتك،و قبل متناموا كل يوم شوفوا مشيتوا خطوة في طريق هدفكوا أو حلمكوا ده ولا لا،انا عن نفسي مش عاوز أكون عشت ٦٠ سنة والناس محستش ببا و دخلت الدنيا و خرجت منها والناس محستش إني غيرت حاجة في الدنيا دي.
لو أنتم شايفين إن ده كلام واحد التعليم المصري مصوره للناس إنه فاشل فأنا فخور إني فاشل،أنا لو نجحت في تعليم فاشل يبقى أنا فاشل و أنا مش فاشل أنا ناجح أوي
شكرا
جملة زودتها بعد ما جالي تعليقات و رسايل من ناس معرفهاش: على فكرة أنا مش بغلط في الأوائل بالعكس عشان فيه ناس بعتتلي تقولي متحكومش على غيرك عشان نجح في النظام بتعنا المتخلف بأنه فاشل،على فكرة أنا مش بغلط في الأوائل خالص بالعكس و أحب أقول لكل حد حس كدة يقرأ النوت تاني لأنه كدة اكيد مفهمش اصدي.
لو أنت بتطلع من الأوائل فأنا مش بهجمك خالص بالعكس إستمر،بس مع التقدير لازم يبقى عندك هدف هتعمل إيه بالتقدير،التقدير لوحده مش بيعمل حاجة ،الأفكار ب ٥ ساغ بس الشطارة في الي يشمر دراعه و يبدأ ينفذ فكرته مش يكون بس بيجيب تقدير و مش عارف هو هيعمل إيه بتقديره ده و مش مخطط هيستفيد منه بإيه و بيقول أنا ناجح وجهة نظري لو كدة بس فده مش نجاح
%ممكن يكون كلامي بفلسفة شوية بس أنا كتبت إلي أنا حاسه و مقتنع بيه ١٠٠
